شاورما الفراخ بتاعتى بطريقة مختلفة خالص وبطعم يجنن بجد تحفة وكمان بالعيش بتاعها
شاورما الفراخ بتاعتى بطريقة مختلفة خالص وبطعم يجنن بجد تحفة وكمان بالعيش بتاعها
أولاً تتبيلة الفراخ يا بنات
1/2 كيلو فراخ مخلية بدقها بانيه يا بنات
بصل - ثوم
ملح- فلفل- بهارات فراخ- شطة - قرفة -جنزبيل- روزمارى - زعتر- ورق لورو- كارى- كسبرة ناشفة-من الاخر حطى أى بهارات عندك ف البيت
نجى للمهم يا بنات أنا بحط عليها كاتشب كاتشب كتييييييييييييييير ممكن نقول كدة لحد ما احس انها غرقانة فى الكاتشب
وبحط كوباية زبادى
ليمون أو خل اللى موجود و شوية زيت مش كتير حوالى ملعقتين كبار
ثانياً التحبيشة بقى بتاعة الشاورما
فلفل رومى - زيتون أسود مخلى ومفروم و لو عندك مشروم بردو حطى -و طماطم - وجبنة رومى لو عاوزين
نيجى بقى للطريقة
بجيب الفراخ وأدقها بانية وأكون فارمة البصل كويس والثوم أتبلها كويس بكل التوابل اللى عندنا وبالملح والفلفل ومننساش الكاتشب والزبادى والليمون أو الخل اللى موجود والزيت
وعلى فكرة ممكن نتبلها من قبلها بكام يوم واحطها فى الفريزر وأطلعها اليوم اللى هطبخها فيه
ودى الفراخ بعد ما اتبلت
نيجى بقى للمفاجأة
بجيب الفراخ وازودلها شوية زيت و كاتشب وبشويها على الشواية
بجد الشواية دى تحفة كنت جايباها من بورسعيد من التجارى ب 45 جنيه وبعدين
لقتها بعد كدة بتتباع فى بورسعيد بردو قدام معدية بورفؤاد ب 19 جنيه
ما علينا
بحط الشواية على البوتجاز تسخن قوى وبعدين بحط شرايح الفراخ تتسوى على نار
عالية مش بتاخد وقت والريحة بتكون ايه جنان ما بتخدش وقت كتير كل ناحية
بتاخد حوالى من 5 دقايق وطول ما بتتشوى بحط من صوص التتبيلة عليها
دى وأنا بشويها
وده شكلها بعد ماتستوى
فى نفس الوقت يا فتوكات بكون جايبة الفلفل والمشروم والزيتون الأسود المفروم وبحطهم فى شوية زيت صغيرين وبحمرهم على نار عالية قوى وأقلب لحد ما أحس أن الفلفل بدأ يدبل
بقطع الفراخ المشوية بالمقص حتت صغيرة بالمنظر ده
وبحط ده على ده وبحط الجبنة الرومى لو حابيين وبقلب بردو على نار عالية لمدة دقيقة
وبعد ما بطفى النار بكون مقطعة الطماطم بحطها وبقلب
وكدة الشاورما خلصت
نيجى بقى للعيش علشان نعمل السندوتشات
المقادير 3 كوب دقيق
1/4 كوب زيت
1 ملعقة صغيرة بيكنج بودر
املعقة صغيرة خميرة
2 ملعقة كبيرة لبن بودرة
1 ملعقة صغيرة ملح
1 ملعقة صغيرة سكر
ماء دافئ للعجن
الطريقة
بدوب السكر والخميرة فى شوية ماء دافئ
بحط باقى المكونات على بعض وبعدين بحط فوقهم الماء الدافئ والخميرة واعجنها كوبيس وكل ما تحنتاج ميه بحط عليها لحد ما تكون طرية وماسكة نفسها ونحس انها بتمط ومبتلزقش فى ايدينا وبسبها تخمر حوالى ساعتين
بقطعها حتت صغيرة وافردها على شكل رغيف
واسويها مجرد ما القيها بتطلع
فقاقيع اقلبها على الناحية التانية مش بتاخد وقت كبير حوالى خمس دقايق
ونخلى بالنا أما نطلعها نغطيها بفوطة نظيفة علشان العيش ما ينشفش وممكن
نحطه فى الفريزر و نبقى نستخدمه فى أى وقت
أنا كدة خلصت
ودى من بعيد أنا كنت عاملة كمان فطائر محشية جبنة و صوابع سوسيس جامدة قوى
وبالهنا والشفا بقى :)
ليست هناك تعليقات