فراخ بطريقة وطعم جديد خااالص 

 

فراخ بطريقة وطعم جديد خااالص 

 دى فرخة مختلفة تماما عن اى فرخة شويتها قبل كده مذاق مختلف واهو تغيير من الروتين الممل وخاصة فراخ السعودية اللى تكره الواحدة فى الفراخ اصلا
العادى بتاعى انى بتبلها ببصل وتوم وتوابل وفلفل اخضر وبتبقى مقطعة وبسويها فى تتبيلتها
وزهقت من نفس الطعم
المرة دى قلت هسبها سليمة مش هقطعها وهحشيها وهشويها فى نفس ذات اللحظة واهو نخترع هما الشيفات احسن مننا فى ايه ؟
ومحطتش بصل خاااااااااالص اول مرة طبعا وفعلا الطعم اختلف تماما وحلوة اوى اوى وعد منى لو عملتوها هتعجبكوا

وندخل على التتبيلة
توم مبشور ناعم اوى او افرميه بطريقتك ومفيش بصل ولا حتى بصل بودر خالص
ليمونتين محترمين عاوزاها يبقى فيها طعم الليمون مع التوم والله العظيم طلعت تحفة بجد
ومعلقة خل ومعلقتين زيت والملح

 

 

وبهاراتك اللى بتحبيها انا المرة دى غيرت شوية حطيت فلفل اسود وكمون وكزبرة مطحونة وجنزبيل وزعتر بس

فى طبق تانى تحضرى الحشوة انا عملت حاجات صغيرة لان الفرخة صغيرة
بسلة مسلوقة وجزر مبشور يا اما يبقى مكعبات بس مسلوق مع البسلة علشان ميبقوش نيين جوة الفرخة وفلفل اخضر قطع صغيرة وخدت عليهم معلقة واحدة من التتبيلة اللى عملناها وقلبتهم كويس

 

 نيجى بقى للست فرخة هانم
هنعمل فى الصدر شقين من كل ناحية لاننا عندنا صدر الفرخة هنا مكلبظ زيادة عن اللزوم ومبيبقاش
واخد من الطعم عملته زى مابنعمل فى السمك المقلى شقوق بالعرض
وهنجيب التتبيلة وندعك الفرخة من جوة كويس جدا ومن برة ونحط فى الشقوق اللى عملناها وندخل صوابعنا من الشقوق دى قدر المستطاع
ونحط جواها الحشوة ونكتفها 

ونحطها فى صينية ونحط الشبكة تحت خالص ونحط عليها الصينية وتبقى نار عالية وهنكون شطفنا طبق اللى كان فيه التتبيلة بحبة مية نحط بقى من المية المتبلة دى حبة صغيرين مع الفرخة فى الصينية وكل شوية نحطلها معلقتين علشان متنشفش
نص ساعة ونقلبها فهتاخد اللون الحلو كانها استوت واتوردت كده بس هتكون لسة محتاجة سوى هنغطيها بفويل لحد ماهتستوى
كل فرخة وحسب حجمها وحسب وقت سواها دى خدت معايا تلت اربع ساعة مكشوفة وتلت ساعة متغطية 

ودى لما طلعت بجد والله العظيم خراااااااافة التوم والليمون فظاع نكهة تانية غير نكهة الشوى التقليدى بتاعنا

ودى من جوة بالحشوة اللى طعمها فظيع