ازاى تخللى الشعر شديد الجفاف والتجعيد طرى وناعم وسهل التسريح

ازاى تخللى الشعر شديد الجفاف والتجعيد طرى وناعم وسهل التسريح

 

 

ازيكوا يا قمرات....عاملين ايه ...صحابى دايما بيسألونى عن طريقه لترطيب الشعر الكيرلى والجاف لانه بيعانى مش بس من الجفاف ده بيبقى مقصف وهايش فى لغالب طبعا وبيتقطع كمان فى التسريح وده لاننا مش بنعرف ازاى نرطب شعرنا صح يادوب بنحط الكريم او الزيت وخلاص على كده وانا كنت واحده منكم لحد ما لقيت احسن طريقه لترطيب الشعر وجربتها لاكتر من شهرين قبل ما اقولكوا عليها وانا اى حاجه بستفاد بيها طبعا لازم اجى افيدكوا

- انا هقول الطريقه والمرطبات المستخدمه ممكن تكون منتجات وممكن يكون منتج واحد طبيعى تقدرى تعمليه فى البيت انا نفسى بابدل فيهم والطرق دى للشعر الجاف والكيرلى او الهايش لكن مش للشعر العادى او الناعم لانها بتخلى الشعر نايم ومفيهوش اى فوليوم كدا

بتناسب الشعر الويفى والكيرلى وشديد التجعيد 

وفى حاجة عايزه اقولها ان بالطريقه دى هتلاقوا الشعرناعم وطرى حتى لو شديد التجعيد ومش هتحتاجى لفرد ولا اى حاجة ايه المشكله ان شعركيبقى مجعد بس طرى جداا وسهل فى التسريح وشكله حلو حتى مع تجعيداته

اللى متابع مواضيعى انا مش بحب اطبق اى حاجه وخلاص لازم تكون ليها اساس علمى او ليها اسباب واضحه ومعروفه فى ليه هى مفيده فالطريقه اللى هقولكم عليها اسمها طريقه ال loc method والفكرة فيها ان الميه بتعتبرافضل مرطب بيمتصها الشعر وبيحميه من الجفاف فانتى لما بتحطى الزيت وبعديه الكريم انتى بتساعدى على كبس الميه لداخل الشعرلاطول فترة ممكنه وكل ما شعرك هيفقد الميه هيفقد الترطيب...للشعر الجاف والويفى بيتعمل الطريقه دى مرة فى اليوم لكن الشعر الجاف جداا والمجعد مرتين فى اليوم وعموما انتى بتعمليها كل ما تحسى ان شعرك بدأ يفقد ترطيبه

وانسى التقصف والجفاف وتكسر الشعر عند التسريح 

LOC Method

L) - Liquid (examples: Water, lightweight leave in conditioner)

(السائل) وافضلهم الميه او اسبراى مرطب للشعريكون خفيف زى جليس او بايوبلاس مثلا بيكون من مكوناته الميه وهتلاقوها مكتوبه عليه من ورا باسم  aqua

O ) - Oil (examples: Extra Virgin Coconut Oil, Extra Virgin Olive Oil, GrapeseedOil, & Shea Butter)

( الزيت ) زى زيت الزيتون او زيت جوز الهنداو زيت بذور العنب او زبده الشيا 

C- Cream or shea butter

(الكريم ) او زبدة الشيا وطبعا تقدرى تستخدمى اى نوع بترتاحيله اوشعرك بيجى عليه وانواع الكريمات لا حصر لها فى منها الرخيص والغالى زى دول

كل الكريمات دى موجوده بس فى الصيدليات الكبيرة زى سيف والعزبى او سمير وليام او اى محل بيبع منتجات التجميل المستورده وانا مجربه منتجات منهم وفى اللى صحابى جربوه وشكروا فيه جداا وكلهم واخدين تقييمات عالميهه عاليه جداا من اللى جربوهم وعندكو طبعا الكريمات العاديه المنتشرة وافضلهم بالنسبة لى

كريم مينك الازرق - هيمالايا بالبروتين - برت بلس للشعر الجاف- زبدة الشيا

الادوات

بتجهزى بخاخة ميه زى كدا 

+ الزيت + الكريم

الطريقه

1- بتقسمى شعرك ل 4 اجزاء

2- بتمسكى الجزء الاول وبتبليه على خفيف كدا يبقى مندى يعنى وبتكبسى الميه فى الشعر وبعد كده بتاخدى من الزيت بتاعك حبه على ايدك كدا وبتدلكى بيه الشعر وبعديه حته من الكريم وبتسرحى كل جزء لحد ماتخلصى كل الاجزاء

الادوات المختلفه او البديله 

- بدل الميه والزيت والكريم بتستخدمى منتج واحدبيغنيكى عن كل ده وانتى اللى بتعمليه بنفسك فى البيت وفى فتوكات كتير عملوا مواضيععن طريقه عمل كريم طبيعى فى البيت وبجد الكريم ده بيبقى مغذى ومفيد للشعر لدرجه فظيعه ومش مكلف خالص وبتبقى عارفه انتى حاطه ايه وهتحطى ايه على شعرك

- انا عندى طريقه مختلفه شويه للكريم هقولكواعليها

الكريم :

بتجيبى 3 معالق زيت جوز هند خام

1 معلقه زيت زيتون

1 معلقه زيت جوجوبا

1 معلقه زيت لوز حلو 

فيتامين E بتجيبى الكبسولات

1 او 2 معلقه جليسيرين

بتحطى المكونات كلها ما عدا الجليسيرين وبتضربيهم بالمضرب او فى الخلاط بس المضرب افضل كتير وبعد كدا بتحطيهم نصف ساعه فى الثلاجه وتطلعيه هتلاقيه بقى جامد هتضربيه تانى و بتضيفى الجليسيرين وربع او نصف كوبايه ميه (مغليه مسبقا) و بتضربيهم كويس لانكوا عارفيين ان الميه مش بتتخلط مع الزيت بسهوله

للاطفال او حتى ليكى ممكن تضيفى اى لون زى اللى بيتحط على التورت والحلويات بيدى شكل تحفففففه يفتح النفس للكريم

ملحوظة :

تقدرى تحطى مقادير متساويه من الكريم ده وكريم التصفيف بتاعك وتستخدميه

وممكن كمان يستخدم زى لوشن Leave inconditioner بانك بتحطى قد معلقه منه على ربع كوبايه ميه فى بخاخة وترجيه كويس جداا وبترطبى بيه شعرك من وقت للتانى 

وده فيديو بيوضح الطريقه بشكل اوضح 

 http://www.youtube.com/watch?feature=player_embedded&v=BpZfj1HPPy4

الطريقه

3- بتقسمى شعرك ل 4 اجزاء
4- بتمسكى الجزء الاول وبتاخدى من اللوشن او الكريم اللى عملناه وبتحطى وهو بيبقى فيه ميه و زيت وكريم كمان لو انتى ضايفه عليه كريموبتعملى كدا لحد ما تخلصى كل الاجزاء

اتمنى انكوا تستفادوا من موضوعى وان شاء الله نتيجة الطريقه دى بتبان بعد اسبوع من الانتظام عليها وطبعا من اول مرة بتحسى بالفرق ولو فتوكه جربت منتج للشعر وفادها ورطب شعرها تقولنا ولو فتوكه قدرت تجرب الطريقه وفادتها او لا تقولنا عشان كلنا نفيد بعضنا ونكون مع بعض عشان نقدر نتخلص من جفاف الشعر وهيشانه خصوصا ان الميه والجو عندنا فى مصر بيخلى شعرنا دايما هايش سواء فى الصيف او الشتا حتى لو ناعم وفتلته حلوة ولو فى اى سؤال انا معاكوا يا قمرات